Boyovut tumani hokimligiga yangi rahbar tayinlandi. Bu haqda Zamin.uz xabar berdi.
Xalq deputatlari Sirdaryo viloyati Boyovut tumani Kengashining navbatdan tashqari sessiyasida tashkiliy masala ko‘rib chiqildi va tuman hokimi lavozimiga yangi shaxs tasdiqlandi. Sessiya qaroriga muvofiq, Xazratqulov Niyoz Namazboyevich Boyovut tumani hokimi lavozimiga tayinlandi.
Niyoz Xazratqulov bundan avval Shirin shahri hokimi sifatida faoliyat yuritgan. Uning yangi lavozimga tayinlanishi tumanda ijtimoiy-iqtisodiy islohotlarni yangi bosqichga olib chiqishi kutilmoqda.
Rasmiy ma’lumotlarga ko‘ra, yangi hokimning asosiy vazifalari tumanning iqtisodiy rivojlanishini jadallashtirish, aholiga xizmat ko‘rsatishni yaxshilash va turmush sharoitlarini yanada qulay qilishga qaratiladi. Shu orqali Boyovut tumani aholisi uchun yangi imkoniyatlar yaratilishi rejalashtirilgan.
