O‘zbekistonda elektr energiyasi ishlab chiqarish 6,38% oshdi

O‘zbekiston Energetika vazirligi 2025-yil yakunlari bo‘yicha hisobot e’lon qildi. Bu haqda Zamin.uz xabar berdi.

Unga ko‘ra, mamlakatda energiya ishlab chiqarish hajmi 6,38 foizga oshib, 81,5 milliard kilovatt-soatdan 86,7 milliard kilovatt-soatga yetgan. Bu haqda upl.uz xabar berdi.

Ayniqsa, iste’molchilarga yetkazib berilgan elektr energiyasi hajmi ishlab chiqarish hajmidan ham tezroq o‘sgan. Bu ko‘rsatkich 14 foizga oshib, 77 milliard kilovatt-soatni tashkil etdi.

Tizim samaradorligi ham yaxshilangan: ishlab chiqarish va yetkazib berish o‘rtasidagi tafovut 14 milliard kilovatt-soatdan 9,6 milliard kilovatt-soatgacha qisqargan. Mamlakatda sanoatlashtirish va shaharlashuv jarayonlari ortib borayotgani sababli iste’molchilar soni ham oshmoqda.

Aholi iste’molchilari soni 3,2 foizga ko‘payib, 8,21 millionga yetgan bo‘lsa, biznes sektordagi yuridik shaxslar soni 7,4 foizga ortib, 519,7 mingga yetgan. 2025-yilda energiya manbalarini diversifikatsiya qilish asosiy yo‘nalishlardan biri bo‘ldi.

Gidroelektr stansiyalari va boshqa qayta tiklanuvchi manbalar asosida ishlab chiqarilgan energiya hajmi 29 foizga oshib, 16,8 milliard kilovatt-soatni tashkil etdi. Qayta tiklanuvchi energiya manbalari mamlakat ehtiyojlarining 20 foizini qoplashni boshladi.

Ayniqsa, quyosh va shamol energetikasi sohasida katta o‘sish kuzatildi: ushbu yo‘nalishda ishlab chiqarish hajmi 2,1 baravar oshib, ilk bor 10,5 milliard kilovatt-soatlik ko‘rsatkichga erishildi. Muqobil energiya manbalari hisobiga 3,2 milliard kub metr tabiiy gaz tejaldi va atmosferaga 4,7 million tonna zararli gazlar chiqishi oldi olindi.

Yil davomida 42 ta yangi ob’ekt ishga tushirilgan bo‘lib, umumiy quvvat 4647 megavattni tashkil etdi. Bular orasida 5 ta fotoelektr stansiya, 4 ta shamol parki va 10 ta energiya saqlash tizimi mavjud.

Bundan tashqari, 1065 megavatt quvvatga ega issiqlik elektr stansiyasi va 2 ta kogeneratsiya qurilmasi ham faoliyatini boshladi. Infratuzilmani yangilash ishlari ham faol olib borildi.

Yil davomida 2050 kilometr elektr uzatish tarmoqlari va 285 kilometr gaz tarmoqlari qurildi. Shuningdek, 787 kilometr magistral va 30 ming kilometr taqsimlash tarmoqlari kapital ta’mirlandi.

10 mingdan ortiq transformator punktlari va bir qancha podstansiyalar yangilandi. Natijada, 954 ta mahallada energiya ta’minoti sifati yaxshilandi.

Bu 800 mingdan ortiq xonadonni qamrab oldi. Shuningdek, yil davomida 2,7 milliard kilovatt-soat elektr energiyasi va 2 milliard kub metr gaz tejalgan.

Qayd etilishicha, O‘zbekiston yiliga o‘rtacha 300 kundan ko‘proq quyoshli ob-havoga ega bo‘lib, bu quyosh panellari samaradorligini oshirish uchun qulay sharoit yaratadi.