“O‘zbekiston-Tojikiston chegarasida yangi logistika markazi quriladi”
O‘zbekiston va Tojikiston chegarasida yangi logistika markazi qurilishi rejalashtirilmoqda. Bu haqda Zamin.uz xabar berdi.
Bu loyiha Yevrosiyo taraqqiyot banki (YeTB), Tojikiston Transport vazirligi va Davlat-xususiy sheriklik (DXSh) loyihalarini amalga oshirish markazi tomonidan boshqarilmoqda. Ular logistika markazi qurilishi bo‘yicha texnik-iqtisodiy asos (TIA) ishlab chiqishni boshladi.
Bu haqda podrobno.uz xabar berdi. Yangi logistika markazi “Fotexobod” va “Oybek” chegara o‘tish punktlari hududida joylashadi.
Loyiha ustida ishlar Dushanbeda imzolangan texnik ko‘mak to‘g‘risidagi bitimdan so‘ng boshlangan. Ushbu hujjatga ko‘ra, YeTBning Texnik ko‘mak fondi loyiha samaradorligini baholash va texnik-iqtisodiy asosni tayyorlash xarajatlarini qoplaydi.
Tojikiston transport vaziri o‘rinbosari Shoista Saidmurodzoda bu loyiha davlat-xususiy sheriklik mexanizmi asosida amalga oshirilayotgan ilk tashabbus ekanini ta’kidladi. YeTBning Tojikistondagi direktori Vladimir Yakunin zamonaviy logistika infratuzilmasini rivojlantirish Tojikistonning 2023–2028 yillarga mo‘ljallangan logistika rivojlanish dasturining asosiy yo‘nalishlaridan biri ekanini qayd etdi.
Ushbu dastur infratuzilmani yangilash, sifatli loyiha hujjatlarini ishlab chiqish va transport-logistika sohasiga investitsiyalarni jalb qilishni maqsad qilgan. Yakunin fikricha, “Fotexobod” loyihasi bo‘yicha TIA ishlab chiqilishi mintaqadagi transchegaraviy savdo samaradorligini oshirishga xizmat qiladi.
Shuningdek, YeTB mazkur markaz qurilishini moliyalashtirish imkoniyatini ham ko‘rib chiqishga tayyor ekanini ma’lum qildi. Ushbu loyiha infratuzilmaviy tashabbuslar sifatini oshirish, mutaxassislar malakasini kuchaytirish va yirik investitsiya loyihalarini amalga oshirish uchun asos yaratishga xizmat qiladi.
Natijada Tojikistonning transport-logistika tizimini rivojlantirish, sektorning investitsion jozibadorligini oshirish va mintaqadagi savdo hajmini ko‘paytirish rejalashtirilmoqda. Bundan tashqari, avvalroq “Oybek” va “Fotexobod” o‘tish punktlari hududida savdo-sanoat zonasi tashkil etish, ishlab chiqarish quvvatlari va logistika infratuzilmasini rivojlantirish masalalari ham muhokama qilingan edi.
