O‘zbekiston Markaziy Osiyoda iqtisodiy o‘sish drayveri bo‘ldi
Birlashgan Millatlar Tashkiloti (BMT) O‘zbekistonni Markaziy Osiyoda barqaror iqtisodiy o‘sishning asosiy drayveri sifatida e’tirof etdi. Bu haqda Zamin.uz xabar berdi.
Hozirgi vaqtda jahon iqtisodiyoti sekinlashayotgan, MDH mamlakatlarida o‘sish sur’atlari susayib borayotgan bir sharoitda O‘zbekiston mintaqa uchun barqaror o‘sish va makroiqtisodiy barqarorlikni ta’minlayotgan davlat sifatida ajralib turmoqda. Bu haqda “Kursiv.uz” xabar berdi.
BMTning 2026-yil uchun “Jahon iqtisodiy holati va istiqbollari” hisobotida ta’kidlanishicha, O‘zbekiston iqtisodiyoti keyingi yillarda o‘sish ko‘rsatkichlari bo‘yicha nafaqat jahon o‘rtacha darajasidan, balki boshqa ko‘plab o‘tish iqtisodiyotlaridan ustun natijalar ko‘rsatgan. Hisobotda qayd etilishicha, 2026–2027-yillarda O‘zbekiston Markaziy Osiyoda iqtisodiy faollikni barqarorlashtiruvchi asosiy omillardan biri bo‘lishi kutilmoqda.
Shuningdek, hisobotda O‘zbekistonda iqtisodiy o‘sishning ichki omillarga tobora ko‘proq tayanayotgani ta’kidlangan. Dastlabki yillarda iqtisodiy faollik Rossiyaga nisbatan sanksiyalar fonida tranzit va reekportdan kelgan daromadlar hisobiga qo‘llab-quvvatlangan bo‘lsa, hozirda mamlakat ichki talab, infratuzilma loyihalariga sarmoya, turizm rivoji va oltin bozoridagi qulay sharoitlar evaziga o‘sishni ta’minlamoqda.
BMT ma’lumotlariga ko‘ra, O‘zbekistonning hozirgi iqtisodiy modeli tashqi tebranishlarga nisbatan kamroq zaiflikni va ichki resurslarga asoslangan barqaror o‘sishni namoyon etmoqda. Bu jarayonda ichki bozor faolligi va iste’mol hajmining oshishi muhim o‘rin tutmoqda.
Bundan tashqari, mamlakatda inflyatsiya darajasi ham pasayib bormoqda. Ilgari ikki xonali inflyatsiya kuzatilgan bo‘lsa-da, BMT prognozlariga ko‘ra, kelgusi yillarda inflyatsiya yanada pasayishi kutilmoqda.
BMT hisobotida mintaqaviy kontekst ham tahlil qilinadi. Rossiyaning MDH mamlakatlaridagi iqtisodiy ta’siri pasayib borayotgan bir paytda, O‘zbekiston o‘z iqtisodiy siyosati va ichki resurslariga tayanib, tashqi shoklarga kamroq qaramlikni namoyish etmoqda.
Bu esa makroiqtisodiy siyosatni mustaqil olib borish imkoniyatlarini oshirmoqda. Shu bilan birga, O‘zbekiston hali ham ayrim cheklovlarga duch kelmoqda.
Dengizga chiqish imkoniyatining yo‘qligi, logistika xarajatlari, xomashyo bozorlariga bog‘liqlik va iqlim xatarlari mamlakat iqtisodiyotini uzoq muddatli zaifliklarga duchor qilishi mumkin. Shu bois, BMT fikriga ko‘ra, kelgusida barqaror o‘sishni ta’minlash iqtisodiyotni diversifikatsiya qilish va infratuzilma loyihalariga sarmoya kiritish samaradorligiga bog‘liq bo‘ladi.
Mintaqaviy taqqoslashlarda O‘zbekiston ko‘plab davlatlarga nisbatan yaxshiroq iqtisodiy natijalarni ko‘rsatmoqda. BMTning baholashicha, mamlakat iqtisodiyoti barqaror rivojlanmoqda va o‘rta muddatli istiqbolda bu sur’atlar saqlanib qoladi.
Bu esa O‘zbekistonning mintaqadagi rolini kuchaytirib, uni faqat rivojlanayotgan iqtisodiyot emas, balki barqaror o‘sishning asosiy drayveri sifatida ko‘rsatmoqda.
