Chirchiqda Airbus vertolyotlariga xizmat ko‘rsatish markazi ochildi
Prezident Shavkat Mirziyoyev Chirchiq aviatsiya ta’mirlash zavodiga tashrif buyurib, unda amalga oshirilgan keng ko‘lamli modernizatsiya ishlari va yangi yuqori texnologik bo‘linmalar faoliyati bilan tanishdi. Bu haqda Zamin.uz xabar berdi.
Ushbu zavod negizida MDH va mintaqada yagona bo‘lgan Airbus vertolyotlariga texnik xizmat ko‘rsatish markazi tashkil etilgan. Mazkur markaz Fransiyaning Airbus kompaniyasi tomonidan rasmiy sertifikatsiyadan o‘tkazilgan bo‘lib, ishlab chiqarish jarayonlari xalqaro standartlarga to‘liq mos ravishda yo‘lga qo‘yilgan.
Markazda G‘arb aviatexnikasining zamonaviy modellari, jumladan, H-125, H-215 va H-130 rusumli vertolyotlar uchun texnik xizmat va ta’mirlash ishlari to‘liq amalga oshiriladi. Bu markaz O‘zbekistonni Airbus vertolyotlari bo‘yicha xizmat ko‘rsatuvchi muhim mintaqaviy markazga aylantirish imkonini beradi.
Tashrif davomida Prezident Shavkat Mirziyoyev markaz imkoniyatlari bilan yaqindan tanishdi va mutaxassislar bilan muloqot qildi. Shuningdek, davlat rahbariga Su-25 harbiy samolyotlarini kapital ta’mirlash va modernizatsiya qilish uchun yangilangan sexlar taqdim etildi.
Ushbu sexlarda ilg‘or texnologiyalar joriy etilib, samolyotlarni zamonaviy navigatsiya tizimlari, tungi ko‘rish qurilmalari hamda bortdagi himoya komplekslari bilan jihozlash ishlari amalga oshirilmoqda. Tashrif yakunida Prezident Shavkat Mirziyoyev mamlakat mudofaa sanoati salohiyatini yanada rivojlantirish va mustahkamlash bo‘yicha muhim topshiriqlar berdi.
Ma’lumot manbasi: zamin.uz.
