“Insoniy birodarlik” mukofoti sovrindorlari e’lon qilindi
Birlashgan Arab Amirliklarida tinchlik, ijtimoiy adolat va turli dinlar o‘rtasida totuvlikni mustahkamlashga qaratilgan nufuzli “Insoniy birodarlik” mukofoti (Zayed Award for Human Fraternity) sovrindorlari e’lon qilindi. Bu haqda Zamin.uz xabar berdi.
Ushbu mukofot har yili jamiyatda ijobiy o‘zgarishlarga hissa qo‘shgan shaxslar yoki tashkilotlarga topshiriladi. Joriy yilgi mukofot Ozarbayjon va Armaniston o‘rtasidagi tarixiy tinchlik kelishuvi uchun, shuningdek, inson huquqlarini himoya qilish borasida faoliyat olib borayotgan Zarqa Yaftaliga taqdim etilishi belgilandi.
Bu sovrinni aniqlashda xalqaro hakamlar hay’ati faoliyat olib bordi. Hay’at tarkibida Markaziy Osiyodan yagona vakil sifatida O‘zbekiston Respublikasi Prezidenti Administratsiyasi rahbari Saida Mirziyoyeva ham ishtirok etdi.
Mukofotni topshirish marosimi 2026 yil 4 fevral kuni BMT tomonidan e’lon qilingan Xalqaro inson birodarligi kunida o‘tkazilishi rejalashtirilgan. Bu mukofot dunyoda tinchlik va hamjihatlikni targ‘ib qilishga qaratilgan muhim tashabbuslardan biri hisoblanadi.
Ma’lumot manbasi: zamin.uz.
