2050 yilda O‘zbekiston urbanizatsiyada yetakchi bo‘ladi
Birlashgan Millatlar Tashkiloti (BMT) ma’lumotlariga asoslangan Ranking tahlillariga ko‘ra, 2050 yilga kelib O‘zbekiston urbanizatsiya darajasi bo‘yicha Markaziy Osiyoda yetakchi o‘rinni egallashi kutilmoqda. Bu haqda Zamin.uz xabar berdi.
Prognozlarga ko‘ra, o‘sha yili mamlakat aholisining 54,6 foizi yirik shaharlarda yashaydi. Qozog‘istonda esa bu ko‘rsatkich 51 foizni tashkil etishi taxmin qilinmoqda.
Shuningdek, 2050 yilda O‘zbekistonda qishloq aholisi ulushi mintaqadagi eng past darajaga — 8,7 foizga tushishi kutilmoqda. Boshqa tomondan, Qozog‘istonda qishloq aholisi ulushi 18,7 foizga yetib, Markaziy Osiyoda eng yuqori ko‘rsatkichga ega bo‘ladi.
2025 yil natijalariga ko‘ra, Markaziy Osiyo aholisi quyidagicha taqsimlangan: 41,1 foizi yirik shaharlarda, 41,6 foizi kichik va o‘rta shaharlarda, 17,3 foizi esa qishloq hududlarida yashagan. O‘sha yili urbanizatsiya bo‘yicha yetakchilik Qozog‘istonda bo‘lgan: aholining 45,3 foizi yirik shaharlarda, 32,2 foizi kichik va o‘rta shaharlarda, 22,4 foizi esa qishloqlarda istiqomat qilgan.
O‘zbekiston esa 2025 yilda urbanizatsiya darajasi bo‘yicha mintaqada ikkinchi o‘rinni egallagan. Aholining 43,8 foizi yirik shaharlarda, 43,4 foizi kichik va o‘rta shaharlarda yashagan.
Qishloq aholisi ulushi esa 12,8 foizni tashkil etib, Markaziy Osiyoda eng past ko‘rsatkich bo‘lgan. Manba: Ranking tahlillari.
