Shavkat Mirziyoyev Davosda Tinchlik kengashi nizomini imzolaydi
O‘zbekiston Respublikasi Prezidenti Shavkat Mirziyoyev 21-yanvar kuni Shveysariyaning Davos shahriga amaliy tashrif bilan jo‘nab ketdi. Bu haqda Zamin.uz xabar berdi.
U yerda u AQSH Prezidenti Donald Tramp taklifiga binoan o‘tkaziladigan Tinchlik kengashi nizomini imzolash marosimida ishtirok etadi. Avvalroq ma’lum qilinganidek, O‘zbekiston bu tashkilotga ta’sischi davlat sifatida qo‘shilish taklifini qabul qilgan.
Tinchlik kengashi tashabbusining asosiy maqsadi – xalqaro hamjamiyatni bir platformada birlashtirish orqali uzoq muddatli tinchlik, barqarorlik va xavfsizlikni ta’minlashdir. Bu yangi xalqaro tuzilma, ayniqsa, G‘azo va Yaqin Sharq mintaqasidagi mojarolarni hal qilish uchun muhim ahamiyatga ega bo‘lishi kutilmoqda.
Manbalarga ko‘ra, Tinchlik kengashi nizomini imzolash marosimi Davosda o‘tkaziladi. Hozirda bir nechta davlatlar bu tashabbusga qo‘shilishga rozilik bildirgan.
Shavkat Mirziyoyev AQSH Prezidenti Donald Trampga yo‘llagan maktubida bu tashabbusni Yaqin Sharqdagi ko‘p yillik mojarolarni hal qilish va mintaqaviy barqarorlikni ta’minlash yo‘lida muhim qadam sifatida baholagan. Yangi tuzilma amalda samarali ishlasa, bu O‘zbekistonning xalqaro maydondagi nufuzini va diplomatik faoliyatini yanada kuchaytirishi mumkin.
Aks holda, bu faqat shunchaki siyosiy tashviqot sifatida qolib ketishi ehtimoli bor. Har holda, Davosdagi uchrashuvlar keyingi oylarda xalqaro munosabatlar rivojiga ta’sir ko‘rsatishi aniq.
Manba: one.uz.
