O‘zbekistonda sun’iy intellektga doir yangi tartiblar joriy etildi
O‘zbekistonda sun’iy intellekt texnologiyalaridan foydalanishda shaxsiy ma’lumotlarni himoya qilish bo‘yicha yangi tartiblar joriy etildi. Bu haqda Zamin.uz xabar berdi.
Adliya vazirligining xabariga ko‘ra, endilikda fuqarolarning shaxsiy ma’lumotlarini ularning roziligisiz qayta ishlash yoki tarqatish uchun ma’muriy javobgarlik belgilangan. Yangi qoidalarga ko‘ra, shaxsiy ma’lumotlarni internet, ommaviy axborot vositalari yoki telekommunikatsiya tarmoqlari orqali noqonuniy tarzda tarqatgan shaxslar 20 million 600 ming so‘mdan 41 million 200 ming so‘mgacha jarimaga tortilishi mumkin.
Bundan tashqari, huquqbuzarlikda qo‘llangan texnik vositalar musodara qilinadi. Qonunchilikda shuningdek, inson huquq va erkinliklariga taalluqli muhim qarorlarni faqat sun’iy intellekt tizimlari xulosalariga asoslanib qabul qilish mumkin emasligi qat’iy belgilab qo‘yildi.
Bu o‘zgartishlar shaxsiy ma’lumotlarning ishonchli himoyasini ta’minlash va sun’iy intellektdan qonuniy va mas’uliyatli foydalanish uchun muhim ahamiyat kasb etadi. Manba: Adliya vazirligi matbuot xizmati.
