366 ming oila kambag‘allikdan chiqdi, ishsizlik kamaydi
O‘tgan bir yil davomida aholining bandligini ta’minlash va daromadlarini oshirishga qaratilgan chora-tadbirlar natijasida mamlakatda kambag‘allik darajasi sezilarli darajada kamaydi. Bu haqda Zamin.uz xabar berdi.
Xususan, 366 ming oila kambag‘allikdan chiqdi. Natijada, kambag‘allik darajasi 8,9 foizdan 5,8 foizgacha pasaydi.
Shu bilan birga, ishsizlik darajasi ham 5,5 foizdan 4,8 foizga tushdi. Bu natijalar amalga oshirilayotgan islohotlarning samaradorligini ko‘rsatadi.
Davlat rahbari ta’kidlaganidek, bunday yutuqlar davlat va xalq o‘rtasidagi ishonchning yanada mustahkamlanayotganidan dalolat beradi. Shu bilan birga, hali oldinda bajarilishi kerak bo‘lgan vazifalar ham talaygina.
Shu sababli 2026 yil “Mahallani rivojlantirish va jamiyatni yuksaltirish yili” deb e’lon qilindi. Bu yil davomida mahallalardagi infratuzilmani yaxshilashga qaratilgan keng ko‘lamli rejalar amalga oshirilishi rejalashtirilgan.
Mahalla, aslida, islohotlarning natijadorligini ko‘rsatuvchi muhim bo‘g‘in hisoblanadi. Agar mahallada ishsizlik yoki kambag‘allik muammosi davom etsa, bu islohotlar u yerga yetib bormaganini anglatadi.
Shuningdek, “yettilik” tizimi yoki banklar aholining muammolarini hal qila olmasa, bu tizimning to‘g‘ri ishlamayotganidan darak beradi. Davlat rahbari hech bir vazir, hokim yoki bankir “yettilik” tizimini bahona qilishga haqli emasligini qayd etdi.
Uning fikriga ko‘ra, barcha zarur imkoniyatlar, mablag‘ va dasturlar mavjud. Yetishmayotgan narsa — mas’uliyat va shaxsiy javobgarlikdir.
Manba: One.uz
