Isroil–Misr chegarasi: O‘zbekiston elchixonasi ogohlantirdi
O‘zbekistonning Isroildagi elchixonasi Isroil va Misr chegarasiga oid yangi ma’lumotlarni e’lon qildi. Bu haqda Zamin.uz xabar berdi.
Elchixonaning rasmiy ma’lumotiga ko‘ra, Isroil va Misr o‘rtasida joylashgan «Begin» («Taba») chegara o‘tish punkti hozirda uzluksiz, ya’ni 24 soatlik ish rejimida faoliyat ko‘rsatmoqda. O‘zbekiston fuqarolari uchun Sinay yarimoroli hududiga kirishda amaldagi va haqiqiy hujjatlarga ega bo‘lgan taqdirda viza talab qilinmasligi ta’kidlangan.
Shuningdek, chegaradan o‘tish jarayonida noqulayliklarning oldini olish maqsadida chegara yig‘imlarini oldindan onlayn tarzda to‘lab qo‘yish tavsiya etiladi. Elchixona xavfsizlik bilan bog‘liq vaziyatni hisobga olgan holda boshqa quruqlikdagi chegara o‘tish punktlaridan foydalanishni hozircha maqbul deb hisoblamayapti.
Shuningdek, Isroil–Misr chegarasidagi o‘tish punktlarining ish tartibi qisqa vaqt ichida o‘zgarishi mumkinligi haqida ogohlantirilgan. Shu sababli, fuqarolarga safar oldidan eng so‘nggi ma’lumotlarni rasmiy manbalar orqali aniqlashtirib olish tavsiya etiladi.
