O‘zbekiston oltin zaxiralari hajmi bo‘yicha 14-o‘rinda
O‘zbekistonning oltin zaxiralari hajmi 390,3 tonnaga yetib, dunyo reytingida 14-o‘rinni egalladi. Bu haqda Zamin.uz xabar berdi.
Bu ma'lumot Jahon oltin kengashi hisobotida keltirilgan. Shu bilan birga, O‘zbekiston Portugaliya va Qozog‘istonni ortda qoldirib, 2025 yilda 7,8 tonna qimmatbaho metall sotib olgan.
2020-2025 yillar oralig‘ida umumiy xarid esa 54,4 tonnani tashkil qilgan. Jahon miqyosida 2025 yilda Polsha oltin xaridi bo‘yicha yetakchiga aylangan bo‘lib, mamlakat Markaziy banki bir yil davomida qariyb 102 tonna oltin to‘plagan.
Keyingi o‘rinlarda Qozog‘iston va Ozarbayjon joylashgan. Braziliya va Turkiya ham yetakchi beshlik orasida.
Oltin narxi ham sezilarli darajada oshdi: 2025 yil boshida bir unsiya oltin taxminan 2 800 dollar bo‘lgan bo‘lsa, 2026 yil boshida 5 000 dollardan ham oshgan. O‘tgan yili asosiy sotuvchilar sifatida Singapur va Rossiya ko‘rsatilgan, uzoq muddatda esa Xitoy 2020 yildan beri 358 tonna bilan eng yirik xaridor bo‘lib qolmoqda.
Eng katta oltin zaxira AQShda bo‘lib, 8 100 tonnani tashkil etadi. 2026 yilning 1 fevral holatiga ko‘ra, O‘zbekistonning oltin-valyuta zaxiralari 75 milliard dollarga yetgan, shundan 65 milliard dollari oltin zaxirasining qiymati hisoblanadi.
Ushbu trend davom etsa, O‘zbekistonning reytingda yanada yuqorilash imkoniyati katta.
