O‘zbekistonda bugun ob-havo o‘zgaruvchan bo‘ladi
Bugun O‘zbekiston hududlarida ob-havo o‘zgaruvchan bo‘lishi kutilmoqda. Bu haqda Zamin.uz xabar berdi.
Xususan, Qoraqalpog‘iston Respublikasida kunduzi yomg‘ir yog‘ishi mumkin, Farg‘ona vodiysi viloyatlarida esa ertalabki soatlarda yog‘ingarchilik kuzatiladi. Kun davomida Toshkent, Samarqand, Jizzax, Sirdaryo va Qashqadaryo viloyatlarining ayrim hududlarida kechga tomon yomg‘ir yog‘ishi ehtimoli bor.
Mamlakatning boshqa hududlarida esa yog‘ingarchilik kutilmaydi, biroq ba’zi joylarda tuman tushishi mumkin. Shamol tezligi 7 dan 12 metrgacha yetadi, havo harorati esa 10 dan 15 daraja iliq bo‘lishi kutilmoqda.
Poytaxt Toshkentda kun davomida yog‘ingarchilik bo‘lmasligi kutilmoqda, ammo kechqurun biroz yomg‘ir yog‘ishi ehtimoli mavjud. Ertalab tuman tushishi kuzatiladi.
Shamol tezligi 3 dan 8 metr sekundgacha bo‘lib, harorat 11 dan 13 daraja iliq bo‘ladi. Tog‘li va tog‘ oldi hududlarda vaziyat biroz boshqacha.
Bu yerlarda vaqti-vaqti bilan yomg‘ir va qor yog‘ishi kutilmoqda. Ayrim joylarda tuman tushishi ham mumkin.
Mutaxassislar tog‘li hududlarda qor ko‘chish xavfi borligini ogohlantirmoqda. Yog‘ingarchiliklar tufayli sel va suv toshqini hodisalari yuzaga kelishi mumkin.
Tog‘li hududlarda shamol tezligi 7 dan 12 metr sekundgacha yetishi, havo harorati esa 3 dan 8 daraja iliq bo‘lishi prognoz qilinmoqda.
