Samarqand Registoni dunyoning eng gozal maskanlari ro‘yxatiga kirdi
Dunyoni aylanib chiqadigan mashhur Time Out nashri 2026 yil uchun eng gozal maskanlar ro‘yxatini e’lon qildi va unda O‘zbekistonning Samarqand shahridagi Registon maydoni ham o‘rin oldi. Bu haqda Zamin.uz xabar berdi.
Bu xalqaro tashkilot tarixiy maydonning betakror me’moriy ansamblini alohida e’tirof etib, undagi XV va XVII asrlarda bunyod etilgan madrasalar hamda nafis bezatilgan gumbazlar tarixiy majmuaning hayratlanarli uyg‘unligini ta’kidladi. Yangi tuzilgan reytingga dunyoning turli burchaklaridan 51 ta yo‘nalish kiritilgan bo‘lib, bu ro‘yxat ekspertlar va tajribali sayohatchilar fikrlari hamda ularning shaxsiy safar tajribasi asosida shakllantirilgan.
Ro‘yxatda tabiiy manzaralar, qadimiy shaharlar va diqqatga sazovor me’moriy obidalarni o‘z ichiga olgan turli maskanlar jamlangan. Joriy yilgi reytingning birinchi uch o‘rnini Ispaniyadagi Picos de Europa tog‘lari, Indoneziyadagi Komodo milliy bog‘i va Nyu-York shahridagi Morgan kutubxonasi hamda muzeyi egalladi.
Shu bilan birga yangilangan ro‘yxatga ilk bor bir nechta maskanlar ham qo‘shildi, jumladan Italiyadagi Bolonya shahri tarixiy markazi va Sardiniya orolidagi Capo Testa yarimoroli kabi joylar. Registon maydoni O‘zbekistonning eng mashhur madaniy ramzlaridan biri bo‘lib, Samarqandga keluvchi mehmonlar uchun asosiy diqqatga sazovor joylardan biri hisoblanadi.
Uning xalqaro reytingga kiritilishi mamlakat boy tarixiy merosi va me’moriy durdonalariga butun dunyo bo‘ylab qiziqish ortib borayotganining yorqin belgisidir. Bu holat bizning qadimiy shahrimiz dunyoga mashhur bo‘lib borayotganini va O‘zbekiston madaniyatining o‘ziga xosligi yuksak baholanayotganini anglatadi.
Samarqandning bunday e’tibor qozonishi kelajakda ko‘proq sayyohlar o‘zimizning tarixiy obidalarimizni ko‘rishi uchun qulay sharoit yaratadi.
