Prezidentlar Buxorodagi suniy intellekt xakaton jarayonlari bilan tanishdilar
O‘zbekiston Respublikasi Prezidenti Shavkat Mirziyoyev va Qozog‘iston Respublikasi Prezidenti Qosim-Jo‘mart To‘qayev Buxoro shahridagi universal sport majmuasida tashkil etilgan sun’iy intellekt bo‘yicha umummilliy xakaton jarayonlari bilan yaqindan tanishdilar. Bu haqda Zamin.uz xabar berdi.
Ushbu yirik tadbir mamlakatimizda raqamli texnologiyalar ekotizimini rivojlantirish hamda innovatsion loyihalarni qo‘llab-quvvatlash maqsadida o‘tkazildi. Mazkur tashabbus O‘zbekistonning raqamli kelajagini shakllantirishda muhim qadam hisoblanadi.
Davlat rahbarlariga mamlakatimizda raqamlashtirishni keng joriy etish borasida amalga oshirilayotgan ishlar yuzasidan batafsil ma’lumot berildi. Xususan, raqamli hukumat tizimi, transport, bojxona, soliq, sog‘liqni saqlash, ijtimoiy himoya, energetika, geologiya, qurilish va qishloq xo‘jaligi sohalarida qo‘llanilayotgan zamonaviy yechimlar namoyish etildi.
Ta’kidlanishicha, ushbu sohalarning raqamlashtirilishi davlat boshqaruvi samaradorligini oshiribgina qolmay, aholiga ko‘rsatilayotgan xizmatlar sifatini ham sezilarli darajada yaxshilamoqda. Shuningdek, ikki davlat o‘rtasidagi startap ekotizimini rivojlantirishga qaratilgan hamkorlik istiqbollari muhokama qilindi.
Prezidentlar bir qator istiqbolli loyihalar faoliyati bilan tanishib, ularning mualliflari bilan muloqot qildilar. Tadbir davomida venchur moliyalashtirish infratuzilmasini kengaytirish, yoshlar tadbirkorligini rag‘batlantirish va innovatsion g‘oyalarni amaliyotga tatbiq etish masalalari alohida qayd etildi.
Bank tizimidagi raqamli o‘zgarishlar, zamonaviy to‘lov texnologiyalari va onlayn xizmatlarning rivoji ham diqqat markazida bo‘ldi. Xakaton doirasida yoshlarning turli sohalardagi dolzarb muammolarni yechishga qaratilgan ijodiy yondashuvlari va sun’iy intellekt texnologiyalarini qo‘llashga bo‘lgan intilishi yuqori baholandi.
Ochiq muloqot ruhida o‘tgan uchrashuv yakunida ikki davlat rahbarlari xakaton ishtirokchilari va startap jamoalari vakillari bilan esdalik uchun suratga tushdilar. Ushbu tadbir O‘zbekiston va Qozog‘iston o‘rtasidagi texnologik hamkorlikni yangi bosqichga olib chiqishda muhim ahamiyat kasb etadi.
