O‘zbekistonning qator viloyatlarida sel kelishi xavfidan ogohlantirish berildi
O‘zbekiston gidrometeorologiya xizmati agentligi mamlakatimiz hududida kutilayotgan noqulay ob-havo sharoiti yuzasidan shoshilinch xabar e’lon qildi. Bu haqda Zamin.uz xabar berdi.
Mutaxassislarning ma’lumotlariga ko‘ra, joriy yilning 28-aprelidan 4-mayiga qadar respublikamizning ko‘plab hududlarida kuchli yog‘ingarchiliklar kuzatilishi kutilmoqda. Shu munosabat bilan, tog‘ oldi va tog‘li tumanlarda sel kelishi hamda suv toshqinlari yuzaga kelishi xavfi mavjudligi haqida ogohlantirish berildi.
Xususan, Qashqadaryo viloyatining Yakkabog‘, Dehqonobod, Chiroqchi, Kitob, Shahrisabz, Qamashi va G‘uzor tumanlarida xavf darajasi yuqori deb baholanmoqda. Shuningdek, Surxondaryo viloyatining Sariosiyo, Uzun, Oltinsoy, Denov, Boysun, Sherobod, Sho‘rchi, Qumqo‘rg‘on va Muzrobot tumanlari aholisi ham ehtiyot choralarini ko‘rishlari tavsiya etiladi.
Samarqand viloyatida Urgut, Samarqand, Bulung‘ur, Nurobod, Qo‘shrabot, Kattaqo‘rg‘on, Payariq, Jomboy va Ishtixon tumanlari sel xavfi ostidagi hududlar ro‘yxatiga kiritilgan. Navoiy viloyatining Xatirchi, Navbahor, Nurota, Konimex va Karmana tumanlarida hamda Jizzax viloyatining Zomin, Baxmal, G‘allaorol, Sharof Rashidov, Forish va Yangiobod tumanlarida ham noqulay tabiiy hodisalar yuz berishi ehtimoli bor.
Toshkent viloyatida esa Ohangaron, Bo‘stonliq, Parkent, Piskent, O‘rtachirchiq, Yuqorichirchiq tumanlari, shuningdek, Angren va Olmaliq shaharlari aholisidan hushyorlikni oshirish so‘raladi. Vodiy viloyatlarida ham vaziyat jiddiy ekani ta’kidlanmoqda.
Namangan viloyatining Pop, Kosonsoy, Chortoq, Chust, Namangan va Yangiqo‘rg‘on tumanlari, Farg‘ona viloyatining So‘x, Shohimardon, Farg‘ona va Beshariq tumanlari, Andijon viloyatining deyarli barcha tumanlari hamda Xonabod shahrida sel-suv toshqinlari kuzatilishi mumkin. Soha mutaxassislari tog‘li hududlarda yashovchi fuqarolardan, dam olish maskanlariga tashrif buyurgan sayyohlardan hamda ushbu hududlarda harakatlanayotgan haydovchilardan barcha xavfsizlik choralariga amal qilishni so‘ramoqda.
Bundan tashqari, kuchli yomg‘ir suvlari to‘planishi oqibatida ayrim aholi punktlarini suv bosishi ehtimoli ham mavjud. Shu sababli, ariq va kanallarni tozalash, suv yo‘llarini ochish kabi profilaktika ishlarini amalga oshirish maqsadga muvofiqdir.
