Ko'p kvartirali uylar hovlisiga avtomobillarni qo'yish taqiqlandi
O'zbekistonda ko'p kvartirali uylar hududida avtomobillarni noto'g'ri joylashtirishga nisbatan qat'iy cheklovlar joriy etildi. Bu haqda Zamin.uz xabar berdi.
Endilikda mashinalarni trotuarlarga, kirish yo'laklari oldiga va boshqa umumiy foydalanishdagi hududlarga qo'yish taqiqlanadi. Ushbu talablar Adliya vazirligi tomonidan ro'yxatdan o'tkazilgan ko'p kvartirali uylarni saqlash va ulardan foydalanish qoidalarida belgilab qo'yilgan.
Yangi tartibga ko'ra, avtomobillarni hovlilardagi maysazorlar, xiyobonlar va bolalar maydonchalari hududiga joylashtirish mumkin emas. Bunday choralar hovli ichidagi harakat xavfsizligini ta'minlash hamda umumiy foydalanishdagi joylarni asrab qolish maqsadida kiritildi.
Shuningdek, qoidalarda uy egalari uchun bir qator boshqa cheklovlar ham nazarda tutilgan. Xususan, balkon va lodjiyalarga yong'in xavfini keltirib chiqaruvchi uskunalar o'rnatish yoki u yerda og'ir buyumlarni saqlash man etiladi.
Balkonlarning tashqi qismiga kiyim-kechak va gilamlarni ilib qo'yishga ham ruxsat berilmaydi, biroq ichki qismda bunday qilish mumkin. Umumiy foydalanishdagi joylar, jumladan zinapoyalar, yerto'lalar va chordoqlarda uy hayvonlarini saqlash taqiqlangan.
Shuningdek, zina maydonchalarida yonuvchan materiallarni qoldirish va isitish tizimlariga o'zboshimchalik bilan o'zgartirish kiritish mumkin emas. Sanitariya va texnik xizmat ko'rsatish masalalari ham alohida tartibga solindi.
Endilikda lift xonalari har hafta tozalanishi, uskunalari esa muntazam ravishda tekshirilishi shart. Agar yerto'lada quvurlar yorilib suv to'plansa, mas'ul organlar ushbu muammoni 24 soat ichida bartaraf etishi lozim.
Mutaxassislarning ta'kidlashicha, ushbu yangiliklar ko'p kvartirali uylarda tartib-intizomni kuchaytirish, tozalikni saqlash va aholi uchun xavfsiz yashash muhitini yaratishga xizmat qiladi.
