Tailand 2026 yildan O'zbekiston fuqarolari uchun vizasiz rejimni bekor qiladi
Tailand hukumati mamlakatga kirish tartibida jiddiy o‘zgarishlar kiritishga qaror qildi. Bu haqda Zamin.uz xabar berdi.
Xususan, vizasiz rejim va chegarada viza olish tizimida yangi qoidalar kuchga kirishi rejalashtirilgan. Dunyo axborot agentligi xabariga ko‘ra, ushbu o‘zgarishlar 2026 yil 15 iyuldan boshlab amal qiladi va 93 ta davlat fuqarolari, jumladan, O‘zbekiston fuqarolari uchun ham ta’sir ko‘rsatadi.
Hozirgi vaqtda O‘zbekiston fuqarolari Tailandga 60 kungacha vizasiz sayohat qilish imkoniyatiga ega edi. Biroq, yangi qaror qabul qilinishi bilan bu imtiyoz bekor qilinadi va o‘zbekistonliklar endi avvalgidek erkin va vizasiz kirib kela olmaydilar.
Mazkur qaror Tailandning rasmiy nashri bo‘lmish Royal Gazette jurnalida e‘lon qilinganidan keyin 15 kun ichida kuchga kiradi. Hozirda rasmiy e‘lonning kelasi haftada chop etilishi kutilmoqda.
Yangi tizimga ko‘ra, O‘zbekiston fuqarolari Tailandga safar qilishdan oldin majburiy ravishda onlayn viza olishlari kerak bo‘ladi. Buning uchun sayyohlar Thai E-Visa platformasiga murojaat qilib, kerakli hujjatlarni yuklashi va ruxsatnomani oldindan rasmiylashtirishi lozim.
Bu jarayon sayohat rejalashtirishda qo‘shimcha vaqt va e‘tibor talab qiladi. Eslatib o‘tamizki, Tailand hukumati joriy yilning 20 mayida xorijliklar ishtirokidagi jinoyatlar sonining oshib borayotgani sababli, 90 dan ortiq davlat fuqarolari uchun vizasiz muddatni qisqartirishini e‘lon qilgan edi.
Avvalgi qaror bilan 60 kunlik vizasiz rejim 30 kungacha qisqartirilgandi. Endi esa vizasiz kirish tamoman bekor qilinib, barcha xorijiy sayyohlar, shu jumladan o‘zbekistonliklar, oldindan viza olishga majbur bo‘ladilar.
Bu qadam mamlakatdagi xavfsizlikni ta‘minlash va sayohat oqimini nazorat qilish maqsadida qilinmoqda. Sayohat qilmoqchi bo‘lgan fuqarolarga rasmiy manbalardan yangiliklarni doimiy kuzatib borish va hujjatlarni o‘z vaqtida tayyorlash tavsiya etiladi.
