Xitoy kompaniyasi Toshkentda 200 km yo‘l quradi

Xitoy kompaniyasi Toshkent shahrida 200 kilometr uzunlikdagi yo‘l va to‘rtta yo‘l o‘tkazgich qurilishini amalga oshiradi. Bu haqida Zamin.uz xabar berdi.

Poytaxt hokimi Shavkat Umurzakov ma’lum qilishicha, ushbu loyiha uchun China State Construction Engineering Corporation kompaniyasidan 300 million dollar, ya’ni taxminan 3,84 trillion so‘m miqdorida moliyaviy mablag‘ jalb qilingan. 

Mazkur mablag‘lar asosan Shota Rustaveli ko‘chasini rekonstruksiya qilish, yangi yo‘llar qurish hamda mavjud yo‘l o‘tkazgichlarini bunyod etishga yo‘naltiriladi. Qurilish va ta’mirlash ishlari doirasida Prezident tomonidan qurilish sohasidagi qonunchilikka zarur o‘zgartirishlar kiritish topshirig‘i berilgan.

Shuningdek, Toshkent shahrida binodan binogacha bo‘lgan yo‘llarni qurish va ta’mirlash ishlari ham rejalashtirilgan. Bu ishlar poytaxt infratuzilmasini yaxshilashga, yo‘l harakati xavfsizligini oshirishga xizmat qiladi.

Loyihaning amalga oshirilishi natijasida shaharda transport oqimi samarali tashkil etiladi va yo‘l infratuzilmasining sifati sezilarli darajada oshadi.