O‘zbekistonda liftlar yillik texnik ko‘rikdan o‘tadi
O‘zbekistonda liftlarning xavfsizligini ta’minlash va ularni nazorat qilish bo‘yicha yangi tartib joriy etildi. Bu haqida Zamin.uz xabar berdi.
Hukumatning 2025 yil 12 iyuldagi 431-son qaroriga muvofiq, liftlarni texnik ko‘rikdan o‘tkazish tartibiga oid nizom tasdiqlandi. Yangi qoidalarga ko‘ra, binolarga o‘rnatilgan va muntazam foydalaniladigan liftlar har yili kamida bir marta majburiy texnik ko‘rikdan o‘tkazilishi shart.
Yangi o‘rnatilayotgan yoki ishga tushirilayotgan har bir lift maxsus elektron axborot tizimiga kiritilishdan oldin dastlabki tekshiruvdan o‘tishi kerak. Bu tekshiruv pudratchi tashkilot arizasi asosida ixtisoslashgan mutaxassislar tomonidan 10 ish kunidan kechikmay amalga oshiriladi.
Texnik ko‘rik natijasiga ko‘ra, liftlarga holatiga mos rangli yorliqlar beriladi. Yashil yorliq to‘liq ishlashga yaroqli liftlarga, moviy yorliq qisman kamchilikka ega liftlarga, sariq yorliq nosoz liftlarga, qizil yorliq esa foydalanish uchun xavfli liftlarga taalluqlidir.
Qizil yorliq bilan belgilangan liftlardan foydalanish mutlaqo taqiqlanadi. Ushbu tartib liftlarning xavfsizligini oshirish va avariyalarni kamaytirishga xizmat qiladi.
