Prezident administratsiyasiga yangi vakolatlar berildi
Davlat boshqaruvi tizimida samaradorlik, proaktivlik va natijadorlikni oshirish chora-tadbirlari to‘g‘risida prezident farmoni e’lon qilindi. Bu haqida Zamin.uz xabar berdi.
Ushbu farmonga muvofiq, Prezident administratsiyasi rahbariga yangi vakolatlar berildi. Endilikda u Prezident maslahatchilari o‘rinbosarlari, Administratsiya tarkibiy bo‘linmalari boshliqlari o‘rinbosarlari, Komplayens xizmati boshlig‘i, Kanselyariya mudiri hamda Administratsiya boshqaruv xodimlarini, shu jumladan ilgari Prezident tomonidan tayinlangan xodimlarni lavozimga tayinlash va lavozimidan ozod etish huquqiga ega bo‘ldi.
Qonunchilikka tegishli o‘zgartirishlar kiritilguniga qadar mazkur xodimlarga Prezident tomonidan tayinlanadigan xodimlar uchun belgilangan barcha huquq, imtiyoz, kafolat va vakolatlar, shuningdek davlat sirlaridan foydalanish bo‘yicha ruxsatnoma berish tartibi tatbiq etiladi. Shuningdek, Prezident administratsiyasi rahbari shtatlar jadvalini tasdiqlash, rivojlantirish loyihalarini amalga oshirish uchun mahalliy va xorijiy mutaxassislar hamda ekspertlarni to‘g‘ridan to‘g‘ri shartnomalar asosida jalb qilish va ularning ish sifatini nazorat qilish vakolatiga ega.
Bu jarayonlarda olimlar, ilmiy izlanuvchilar va tadqiqotchilar ham ishtirok etadi va ularning ish haqlari milliy yoki chet el valyutasida to‘lanadi. Ushbu farmonga ko‘ra, Avtomatlashtirilgan axborot-kommunikatsiya agentligi tugatildi.
Bundan tashqari, Prezident administratsiyasi rahbariga beshta o‘rinbosar tayinlandi. Bu o‘zgarishlar davlat boshqaruvida samaradorlikni oshirishga qaratilgan muhim qadam hisoblanadi.
