Mobiuz mobil operatori 300 million dollarga sotiladi
O‘zbekistonning mobil aloqa operatori Mobiuz’ni 300 million dollarga sotish rejalashtirilmoqda. Bu haqida Zamin.uz xabar berdi.
Bu haqda Kursiv.media Bloomberg manbalariga tayangan holda xabar berdi. Hukumat Qatar, Saudiya Arabistoni, Ozarbayjon va Yevropadan investorlarni jalb qilishni maqsad qilgan.
Mobiuz mamlakatdagi to‘rtinchi yirik mobil aloqa operatori hisoblanadi. BMI tahlil kompaniyasining ma’lumotlariga ko‘ra, 2024 yil oxirida uning bozordagi ulushi 20,9 foizni tashkil qilgan.
O‘zbekiston bozorida umumiy abonentlar soni 35,6 million nafarga yetgan. Shu yil Mobiuz’ning daromadi 164 million dollar, EBITDA ko‘rsatkichi esa 41 million dollarni tashkil etgan.
Kompaniyaning 100 foiz ulushi Prezident Shavkat Mirziyoyev tomonidan boshlangan keng qamrovli xususiylashtirish dasturi doirasida sotilmoqda. O‘zbekiston 29 ta yirik korxonaning aktivlarini xususiylashtirish orqali kamida 10 trillion so‘m, ya’ni 786 million dollar miqdorida mablag‘ jalb qilishni ko‘zlamoqda.
Bu davlat iqtisodiyotidagi ulushni kamaytirish va xorijiy investitsiyalarni oshirish strategiyasining bir qismidir. Mobiuz’ni sotish bo‘yicha tender 2025 yil iyun oyida e’lon qilingan.
Qiziqqan investorlar 1 avgustgacha qiziqish xatlarini topshirishlari kerak. Bitim bo‘yicha maslahatchi sifatida Rothschild & Co kompaniyasi jalb qilingan.
VEON kompaniyasi O‘zbekistonda biznesini kengaytirish imkoniyatlarini muntazam ko‘rib chiqayotganini ma’lum qilgan, ammo ushbu tenderda ishtirok etishini rasmiy tasdiqlamagan.
