Gyundogan “Manchester Siti”ni tark etish sababini aytdi
Yarim himoyachi Ilkay Gyundogan “Manchester Siti”ni tark etib, “Galatasaroy”ga o‘tishiga sabab bo‘lgan omillar haqida gapirdi. Bu haqida Euro-football.ru xabar berdi.
34 yoshli futbolchi Istanbul klubi safiga erkin agent sifatida qo‘shildi. O‘tish haqidagi rasmiy e’lon dushanba kuni berildi.
Gyundogan muxlislariga murojaat qilib, ketishining asosiy sababini shunday izohladi: “Aziz ‘Manchester Siti’ jamoasi, sizlarga rostgo‘y bo‘lishni istayman. Men futbol o‘ynashni juda yaxshi ko‘raman va imkon qadar ko‘proq maydonga tushishni xohlayman.
Yaqinda 35 yoshga to‘laman, lekin o‘zimni juda yaxshi his qilaman va Chempionlar ligasi darajasidagi jamoa uchun o‘ynashga qodirman deb ishonaman. Shuningdek, bolalikdagi sevimli klubimga qo‘shilish imkoniyatini qo‘ldan boy bermoqchi emasman.
Endi men o‘zim uchun juda qadrli bo‘lgan mamlakatda o‘ynayman. Barchasi uchun rahmat.
“Manchester Siti”ga katta minnatdorchilik bildiraman, bu buyuk klub menga ko‘p narsani berdi”. Ilkay Gyundogan 2016 yildan 2023 yilgacha, shuningdek 2024 yildan hozirgi kungacha “Manchester Siti” sharafini himoya qilgan.
Endi u yangi jamoasi bilan yangi marralarni zabt etishga intilmoqda.
