Raul Gonsales: Men Realga yana qaytaman
Sobiq “Real Madrid” va Ispaniya terma jamoasi futbolchisi Raul Gonsales Madrid Universal portaliga intervyu berdi. Bu haqida Euro-football.ru xabar berdi.
Suhbat davomida u “Castilla” jamoasida, ya’ni “Real”ning zaxira tarkibida murabbiylik faoliyati haqida esdaliklarini o‘rtoqlashdi. Raulning aytishicha, u ikki mavsum davomida Gonsalo bilan ishlagan va unga so‘nggi turtki bergan.
Hozirda Gonsalo ushbu imkoniyatdan yaxshi foydalanib, asosiy jamoada yaxshi o‘ynamoqda. Raul ushbu davrni juda yaxshi deb hisoblaydi, chunki u ko‘plab yosh futbolchilarning rivojlanishini ko‘rgan, ular hozir birinchi divizionda faoliyat yuritmoqda.
Shuningdek, Raul yaqinda yoki uzoqroq kelajakda yana “Real”ga qaytishini ta’kidladi. U klubni o‘zining uyiga o‘xshatib, u yerda bo‘lishni istaganini bildirdi va vaqt kelganda yana qaytishini aytdi.
Raul “Real” safida 1994 yildan 2010 yilgacha o‘ynagan, jami 741 o‘yin o‘tkazib, 323 ta gol urgan. Ispaniya terma jamoasi safida esa 102 ta o‘yinda maydonga tushib, 44 ta gol kiritgan.
