«Barselona» bosh murabbiyi Hans-Diter Flik start tarkibda hujumchi Rafinya Diasni maydonga tushirmaslik qarorini izohladi. Bu haqda Euro-football.ru xabar berdi.
Braziliyalik futbolchi yakshanba kuni «Valensiya»ga qarshi o‘yinni zaxiradan boshladi va tanaffusdan keyin maydonga tushib, debyut qilgan Runi Bardjijini almashtirdi. O‘yin davomida 28 yoshli hujumchi ikki bor gol urdi.
Uchrashuv kataloniyaliklarning katta hisobdagi g‘alabasi bilan yakunlandi – 6:0. O‘yindan oldin ommaviy axborot vositalarida Flik Rafinyani asosiy tarkibdan chiqarib, kechikgani uchun jazolagani haqida xabarlar tarqaldi.
Biroq murabbiy bunday ma’lumotni rad etdi. Uning so‘zlariga ko‘ra, bu texnik qaror bo‘lib, start tarkibga Runi tanlangan, chunki u mashg‘ulotlarda juda yaxshi harakat qilgan va ishga bo‘lgan munosabati a’lo darajada bo‘lgan.
«Barselona» La Liga musobaqasining to‘rtinchi turidan so‘ng o‘nta ochko to‘pladi.
