Amorim ishdan bo‘shatilsa, 13,8 million yevro oladi
Portugaliyalik mutaxassis Ruben Amorim "Manchester Yunayted" jamoasining bosh murabbiyi lavozimidan ozod etilsa, katta miqdorda kompensatsiya oladi. Bu haqda Euro-football.ru xabar berdi.
Daily Mail nashrining xabariga ko‘ra, agar Amorim 11 noyabrgacha ishdan bo‘shatilsa, "qizil iblislar" jamoasi rahbariyati unga 13,8 million yevro miqdorida jarima to‘lashi kerak bo‘ladi. Ushbu shartnoma bandi yosh mutaxassis bilan tuzilgan mehnat kelishuvida ko‘rsatilgan.
40 yoshli Amorim 2024 yil noyabr oyida "Manchester Yunayted" jamoasiga bosh murabbiy etib tayinlangan va ikki yarim yillik shartnoma imzolagan. Ommaviy axborot vositalari ma’lumotlariga ko‘ra, uning yillik maoshi 7,5 million yevroni tashkil etadi.
Hozirgi vaqtda Angliya Premer Ligasi musobaqasida to‘rt tur o‘tkazilganidan so‘ng, "Manchester Yunayted" 14-o‘rinda bormoqda va jamoa to‘plagan ochkosi to‘rtga teng. Jamoaning natijalari va murabbiylik faoliyati hozircha kutgan darajada emasligi sezilmoqda.
