Jek Uilshir "Luton Taun" jamoasining bosh murabbiyi etib tayinlandi
Sobiq yarim himoyachi, Londonning Arsenal klubida o‘ynagan Jek Uilshir bosh murabbiy sifatida o‘z faoliyatini boshlaydi. Bu haqda Euro-football.ru xabar berdi.
33 yoshli mutaxassis Angliyaning Birinchi ligasida ishtirok etuvchi Luton Taun jamoasining bosh murabbiyi lavozimini qabul qildi. Bu haqda ishonchli manba Fabrizio Romano xabar berdi.
Tomonlar o‘zaro hamkorlik shartlarini kelishib oldi va tayinlov rasman dushanba kuni e’lon qilinadi. Jek Uilshir 2022 yilda futbolchilik faoliyatini yakunlagan.
Shundan so‘ng, u Arsenal yoshlar jamoasida murabbiylik ishlarini boshlagan. 2024 yil oktabridan 2025 yil mayigacha esa Norvich klubida bosh murabbiyning yordamchisi bo‘lib ishladi.
Luton Taun joriy mavsumda Birinchi liga turnir jadvalida 11-o‘rinni egallab turibdi. O‘tgan mavsumda bu jamoa Chempionship ligasidan chiqib ketgan, undan oldingi yili esa Premyer ligadan tushib qolgan.
Jamoaning maqsadi yangi bosh murabbiy rahbarligida yuqori pog‘onalarga ko‘tarilishdir.
