Pol Pogbaning Monakodagi faoliyati xavf ostida

Pol Pogbaning faoliyatidagi so‘nggi vaziyatlar kutilganidek o‘xshamayapti. Bu haqda Zamin.uz xabar berdi.

Monako klubi fransiyalik yarim himoyachini o‘tgan yozda o‘z safiga qo‘shib olgan edi. Klub futbolchining doping sababli diskvalifikatsiyadan keyin formaga kirishi uchun vaqt kerak bo‘lishini tushungan edi.

Ammo Pogbaning tiklanish jarayoni kutilganidan ancha uzoq davom etmoqda. Shu vaqtgacha u jamoa safida atigi 30 daqiqa maydonga tushishga muvaffaq bo‘ldi.

Bu haqda "euro-football.ru" nashri xabar bermoqda. Italiyaning "Gazzetta dello Sport" nashri ma’lumotiga ko‘ra, Monako klubi Pogba bilan tuzilgan shartnomani muddatidan oldin bekor qilish masalasini ko‘rib chiqmoqda.

Aslida ushbu shartnoma 2027 yil yozigacha mo‘ljallangan edi. Biroq futbolchining uzoq tiklanish jarayoni va jamoaga yetarlicha foyda keltirmayotgani sababli tomonlar o‘zaro kelishuvni tugatishi mumkin.

Ma’lumki, Pol Pogba mart oyida 33 yoshga to‘ladi. U hozirda navbatdagi jarohatdan tiklanish jarayonida.

Ushbu vaziyat uning faoliyatiga qanday ta’sir ko‘rsatishi va kelajakda qanday qarorlar qabul qilinishi hozircha noma’lum bo‘lib qolmoqda.