Nodirbek Abdusattorov Tata Steel Chess 2026 g‘olibi!
O‘zbekistonlik shaxmat grossmeysteri Nodirbek Abdusattorov Niderlandiyaning Veyk-an-Zee shahrida o‘tkazilgan Tata Steel Chess 2026 turnirida bosh sovrinni qo‘lga kiritdi. Bu haqda Zamin.uz xabar berdi.
Ushbu musobaqa dunyoning eng nufuzli va qadimiy shaxmat turnirlaridan biri hisoblanadi. To‘rt yillik doimiy mehnat va qat’iyat natijasida Abdusattorov shaxmat olamining «Uimbldoni» deb ataladigan bu turnirda tarixiy g‘alabaga erishdi.
O‘zbekiston bayrog‘i yana bir bor xalqaro maydonda baland ko‘tarildi. Nodirbek uchun bu zafar bolalikdan orzu qilgan yirik maqsadlaridan birining amalga oshishi bo‘ldi.
So‘nggi to‘rt yil davomida u chempionlikka juda yaqin kelgan edi: 2023 yilda 2-o‘rin, 2024 va 2025 yillarda esa 3-o‘rinlarni egallagan. Nihoyat, 2026 yilgi musobaqada u oltin medalni qo‘lga kiritib, o‘zining eng katta yutug‘ini qayd etdi.
Turnir davomida Abdusattorov o‘zining barqaror o‘yinlari bilan ajralib turdi. U 13 imkoniyatdan 9 ochko to‘pladi, 6 ta g‘alaba, 6 ta durang va faqat 1 ta mag‘lubiyat qayd etdi.
Ushbu natija uning onlayn reytingida dunyoning eng kuchli besh shaxmatchisi qatoriga qaytishiga sabab bo‘ldi. Musobaqaning so‘nggi turida u hindistonlik kuchli raqib Arjun Erigaysini mag‘lub etib, chempionlikni qo‘lga kiritdi.
Turnirda yana bir o‘zbekistonlik shaxmatchi Javohir Sindarov ham yuqori natija bilan ajralib turdi va 2-o‘rinni egalladi. Bu g‘alaba O‘zbekiston shaxmat maktabining kuchli ekani va xalqaro maydonda o‘z o‘rniga ega ekanini yana bir bor isbotladi.
Endi Nodirbekni navbatdagi katta musobaqa kutmoqda. 13–15-fevral kunlari Germaniyaning Vanjel shahrida o‘tadigan FIDE Freestyle Chess World Championship 2026 turnirida u ishtirok etadi.
Ushbu musobaqa rapid formatida o‘tkaziladi va unda dunyoning eng kuchli sakkiz nafar shaxmatchisi bellashadi. Sovrin jamg‘armasi 300 ming AQSH dollarini tashkil etadi.
Nodirbek Abdusattorovning bu g‘alabasi yurtimiz shaxmatchilari uchun katta ilhom va yangi marralarga erishish uchun motivatsiya bo‘lib xizmat qiladi. Sizningcha, Nodirbek fevral oyidagi musobaqada ham muvaffaqiyatga erishib, bosh sovrinni qo‘lga kirita oladimi?
