Ronaldu "An-Nasr"dagi muhitdan norozi bo‘ldi

Jahon futbolining eng yorqin yulduzlaridan biri Krishtianu Ronaldu atrofida yana qizg‘in muhokamalar avj oldi. Bu haqda Zamin.uz xabar berdi.

Portugaliyaning "A Bola" nashri xabariga ko‘ra, Ronaldu hozirgi klubi "An-Nasr"dagi ichki muhitdan norozi va ayrim uchrashuvlarda maydonga tushishni istamayotgani haqida ma’lumot bergan. Manbalarning yozishicha, Ronaldu Saudiya Pro-ligasi doirasida "An-Nasr" jamoasi safida "Ar-Riyod"ga qarshi o‘yinda ishtirok etmasligini bildirgan.

Uning noroziligi asosan klub boshqaruvi va investitsiyalar masalasiga borib taqaladi. U Saudiya Davlat investitsiya jamg‘armasining (PIF) klub faoliyatidagi qarorlaridan qoniqmayotganini va jamoaga yetarlicha sarmoya kiritilmayotganini ta’kidlagani aytilmoqda.

Shuningdek, Ronaldu "An-Nasr"ni raqobatchi "Al-Hilol" klubi bilan solishtirib, transfer bozorida faoliyatda katta farq borligini qayd etgan. U klub faqat maydondagi natijalar bilan cheklanmasdan, “katta maqsadlar” sari jiddiy qadam tashlashi lozimligini ta’kidlagan.

Eslatib o‘tamiz, Krishtianu Ronaldu Saudiya Pro-ligasiga 2022-yil oxirida kelgan va "An-Nasr" bilan shartnomasini 2027-yil iyunigacha uzaytirgan edi. Ammo ichki muhit yaxshilanmasa, bu holatlar jamoa uchun yanada katta muammolarni keltirib chiqarishi mumkin.