Abduqodir Husanov: Zaxiradan asosiy tarkibga qadar
O‘zbekiston milliy terma jamoasi himoyachisi Abduqodir Husanov uchun joriy mavsumning birinchi yarmi oson kechmadi. Bu haqda Zamin.uz xabar berdi.
Jarohatlar sababli u asosiy tarkibdagi o‘rnini yo‘qotib qo‘ydi va o‘yin amaliyoti kamayib ketdi. Ba’zi davrlarda u maydondan butkul chetda qolgandek tuyuldi.
Ammo futbolda imkoniyat kutilmagan joydan chiqishi mumkin. Xosep Gvardiola boshqaruvidagi “Manchester Siti” jamoasida asosiy himoyachilar Ruben Diash, Jon Stounz va Yoshko Gvardiol jarohat olgach, 21 yoshli Husanov maydonga tushib, jamoa uchun muhim o‘yinchi bo‘lib chiqdi.
So‘nggi uchrashuvlarda u himoya chizig‘ida ishonchli harakat qilib, jamoaning muhim figurasi sifatida ko‘zga tashlandi. Husanovning o‘yini nafaqat murabbiylar, balki muxlislar tomonidan ham e’tirof etildi.
Yanvar oyida “Manchester Siti” muxlislari o‘rtasida o‘tkazilgan so‘rovnomada u oyning eng yaxshi futbolchisi deb topildi. Bu esa uning o‘zini maydonda qanday ko‘rsatayotganini yaqqol isbotlaydi.
Biroq qishki transfer oynasida kutilmagan voqealar ro‘y berdi. Abduqodir Husanovni sotib olish istagida Angliya Premer-ligasidan ikki klub, ya’ni “Everton” va “Bornmut”, “Siti” bilan aloqaga chiqqani haqida xabarlar tarqaldi.
Jurnalist Kamil Fishbaxning ma’lumotiga ko‘ra, “Everton” Husanovni to‘liq transfer qilish variantini ko‘rib chiqqan. Bu klub himoya chizig‘ini kuchaytirish maqsadida Husanovga qiziqish bildirgan.
Shuningdek, Jek Grilish bilan bog‘liq ijara rejasi ham muhokama qilingan. Garchi “Everton” qishda bu maqsadga erisha olmagan bo‘lsa-da, yozgi transfer oynasida yana urinib ko‘rishi mumkinligi aytilmoqda.
“Bornmut” esa Husanovni ijaraga olish variantini taklif qilgan. Klub jamoani kuchaytirish uchun manchesterliklar bilan aloqalarni ishlatmoqchi bo‘lgan.
Ammo “Manchester Siti” rahbariyati va Gvardiola Husanovni qo‘yib yuborish niyatida emasligi haqida ma’lumot berilgan. Xulosa shuki, Abduqodir Husanov o‘z o‘rnini qaytarib olishga muvaffaq bo‘ldi va hozirda jamoa uchun muhim o‘yinchilardan biriga aylandi.
Agar u o‘zining hozirgi o‘yini va barqarorligini saqlab qolsa, yozgi transfer oynasida yana ko‘plab qiziqishlarga sabab bo‘lishi mumkin. Husanov haqida “zaxirada qoldi” degan fikrlar esa tobora nojo‘ya bo‘lib bormoqda.
Manba: One.uz
