Denis Makarov jarohat oldi, maydonga qaytish muddati noma’lum.

Turkiyaning "Kayserispor" futbol klubida faoliyat yuritayotgan rossiyalik yarim himoyachi Denis Makarov jarohat olgani sababli noma’lum muddatga maydonga tusha olmaydi. Bu haqda Zamin.uz xabar berdi.

Bu haqda klubning matbuot xizmati ma’lum qildi. Shuningdek, ushbu xabarni euro-football.ru sayti ham tasdiqlagan.

Tibbiy ko‘rik natijalariga ko‘ra, futbolchining o‘ng sonining yuqori qismidagi mushaklar guruhida yengil jarohat va shish aniqlangan. Klub bayonotiga ko‘ra, Makarovning davolanish jarayoni davom etmoqda.

Hozircha uning maydonga qaytishi uchun aniq muddat belgilanmagan. Denis Makarov "Kayserispor" tarkibida debyut o‘yinini 3-fevral kuni "Galatasaray"ga qarshi o‘tkazgan edi.

Ushbu uchrashuvda "Kayserispor" 0:4 hisobida mag‘lubiyatga uchragan. Klub hozirda turnir jadvalida 17-o‘rinda bormoqda va ligadan tushib ketmaslik uchun kurash olib bormoqda.

Ma’lumot uchun, Makarov ilgari Moskvaning "Dinamo" klubida o‘ynagan va keyinchalik erkin agent sifatida jamoani tark etgan.