Dro Fernandes PSJ safida ilk bor maydonga tushdi
8-fevral kuni Fransiya chempionatining 21-turida PSJ jamoasi "Marsel"ni yirik hisobda mag‘lub etdi — 5:0. Bu haqda Zamin.uz xabar berdi.
Ushbu uchrashuv Parij klubi tarkibiga yaqinda qo‘shilgan Dro Fernandes uchun ham alohida ahamiyatga ega bo‘ldi. U yangi jamoasi safida ilk bor maydonga tushdi.
Bu haqda euro-football.ru xabar berdi. Yarim himoyachi Dro Fernandes o‘yinning 75-daqiqasida Senni Meyuly o‘rniga zaxiradan maydonga tushdi.
U qisqa vaqt ichida samarali o‘yin namoyish etdi: 6 ta aniq pas uzatdi, 1 marta raqibini dribling bilan aldadi va 3 marta unga nisbatan qoida buzildi. "O‘z jamoam tarkibida birinchi o‘yinimni o‘tkazganimdan juda mamnunman.
O‘zimni xuddi uyimdagidek his qildim. Barcha ishlar silliq kechishi uchun klub xodimlari va jamoadoshlarimga minnatdorchilik bildiraman.
Stadiondagi muhitni so‘z bilan ifodalash qiyin: bu aqlbovar qilmas darajada edi! Muxlislarga ko‘rsatgan qo‘llab-quvvatlovi uchun rahmat", — dedi Fernandes o‘yindan keyin klub rasmiy saytiga bergan intervyusida.
Ma’lumot uchun, PSJ Dro Fernandesni transfer qilish uchun "Barselona" klubiga 8 million yevro to‘lagan. Futbolchi parijliklar bilan 2030-yilgacha mo‘ljallangan shartnoma imzolagan.
