MMA jangida sportchi raqibining qulog‘ini tishladi
7-fevral kuni Chexiyaning Brno shahrida “Clash MMA 15” turniri bo‘lib o‘tdi. Bu haqda Zamin.uz xabar berdi.
Kechaning asosiy jangida slovakiyalik Pavol Vasko va mezbon jangchi Vatslav Mikulshek oktagonda to‘qnash kelishdi. Ushbu jang texnik zarbalar va shiddatli kurashlardan ko‘ra, kutilmagan va g‘alati voqea bilan esda qoldi.
Bellashuvning birinchi raundida juda noodatiy holat yuz berdi. Mikulshek raqibini yerga tushirish uchun “teykdaun” usulini qo‘llamoqchi bo‘lganida, Pavol Vasko kutilmaganda uning qulog‘ini tishlab oldi.
Bu holatdan keyin jang to‘xtatildi, chunki Mikulshekning qulog‘idan qon oqishi boshlandi. Ushbu voqea turnirning umumiy muhitini ham izdan chiqardi, jang bir zumda mojaroga aylandi.
Biroq voqealar faqat oktagon bilan cheklanib qolmadi. Pavol Vasko kiyinish xonasiga yo‘l olganida, tribunadagi muxlislar unga qarshi norozilik bildira boshlashdi.
Ayrim tomoshabinlar uni haqorat qilishdi, hatto bir muxlis unga stul otishga urindi. Ushbu keskinlik sababli Pavol tezda arenani tark etishga majbur bo‘ldi.
Ta’kidlash joiz, bu jang ikki sportchi o‘rtasidagi revansh edi. Ular birinchi bor 2025-yil dekabr oyida bellashgan bo‘lib, o‘shanda ham Pavol Vasko qoidabuzarlik tufayli diskvalifikatsiya qilingan edi.
Bu safar ham u sportchilikdan ko‘ra mojaro bilan esda qoladigan holatni tanladi. Brnodagi ushbu kecha MMA muxlislari uchun adrenalinli bo‘ldi, biroq bu adrenalin texnik zarbalar yoki kombinatsiyalardan emas, balki jang madaniyatiga to‘g‘ri kelmaydigan xatti-harakatlardan kelib chiqdi.
Endi tashkilotchilar ushbu voqea bo‘yicha qanday qaror qabul qilishlari hammani qiziqtirmoqda. Manba: zamin.uz
