Rossiya va Isroil o‘rtasida o‘yin o‘tkazilishi mumkin
Sobiq SSSR terma jamoasi darvozaboni Aleksandr Uvarov Rossiya va Isroil terma jamoalari yaqin kelajakda o‘rtoqlik uchrashuvi o‘tkazishi mumkinligini bildirdi. Bu haqda Zamin.uz xabar berdi.
Hozirda Uvarov Isroilning Tel-Aviv shahridagi “Makkabi” klubida yoshlar jamoasi darvozabonlari murabbiyi sifatida faoliyat olib bormoqda. Bu haqda euro-football.ru xabar berdi.
Uvarovning so‘zlariga ko‘ra, bunday o‘yin tashkil etilishiga hech qanday jiddiy to‘siq yo‘q. U 2026 yilga kelib Rossiya tomoni tashabbus ko‘rsatgan taqdirda, Rossiya va Isroil terma jamoalari o‘rtasidagi bahsni kuzatishimiz mumkinligini ta’kidladi.
Shuningdek, u ikki mamlakat futbol federatsiyalari o‘rtasidagi munosabatlar ijobiy ekanini qayd etdi. Ma’lumki, Rossiya terma jamoasi xalqaro sanksiyalar sababli hozirda asosan faqat o‘rtoqlik uchrashuvlarini o‘tkazmoqda.
Shu bois mart oyida o‘tishi rejalashtirilgan yig‘in uchun raqiblar hali rasman e’lon qilinmagan. Uvarovning fikricha, Rossiya va Isroil o‘rtasidagi futbol aloqalari bunday o‘yinlarni o‘tkazish uchun qulay sharoit yaratadi.
