Rossiya va Isroil o‘rtasida o‘yin o‘tkazilishi mumkin
Sobiq SSSR terma jamoasi darvozaboni Aleksandr Uvarov yaqin yillarda Rossiya va Isroil terma jamoalari o‘rtasida o‘rtoqlik uchrashuvi o‘tkazilishi ehtimoli borligini aytib o‘tdi. Bu haqda Zamin.uz xabar berdi.
Hozirda Uvarov Isroilning Tel-Aviv shahridagi «Makkabi» futbol klubining yoshlar jamoasida darvozabonlar murabbiyi sifatida faoliyat yuritmoqda. Bu haqda euro-football.ru sayti xabar bergan.
Uvarovning fikriga ko‘ra, bunday o‘yin uchun hech qanday jiddiy to‘siq yo‘q. Agar Rossiya tomoni bu borada tashabbus ko‘rsatsa, 2026 yilga kelib Rossiya va Isroil terma jamoalari o‘rtasidagi bahsni ko‘rish mumkin bo‘ladi.
Uning so‘zlariga ko‘ra, ikki davlatning futbol federatsiyalari o‘rtasidagi aloqalar yaxshi darajada saqlanib qolmoqda. Shu bilan birga, eslatib o‘tish joizki, hozirgi kunda Rossiya terma jamoasi xalqaro sanksiyalar tufayli faqat o‘rtoqlik uchrashuvlarini o‘tkazish imkoniyatiga ega.
Mart oyida bo‘lib o‘tadigan navbatdagi yig‘in uchun raqiblar hali e’lon qilinmagan.
