Tochilin: Rossiya sportiga sanksiyalar bekor bo‘lishi mumkin
Futbol bo‘yicha ekspert Aleksandr Tochilin yaqinda bergan intervyusida Rossiya sportiga qo‘yilgan cheklovlar va ularning bekor qilinishi ehtimoli haqida fikr bildirdi. Bu haqda Zamin.uz xabar berdi.
U FIFA prezidenti Janni Infantinoning Rossiya terma jamoalari va klublariga nisbatan taqiqni bekor qilish haqidagi so‘zlariga hamda Xalqaro Olimpiya Qo‘mitasi (MOK) tomonidan Rossiyaga nisbatan sanksiyalarni olib tashlash ehtimoli yuzasidan munosabatini bayon etdi. Bu haqda euro-football.ru xabar bermoqda.
Tochilin dunyo ommaviy axborot vositalarining Milanda o‘tkazilgan MOK yig‘ilishi haqida bergan xabarlariga e’tibor qaratdi. Unga ko‘ra, yig‘ilishda Rossiya sportiga nisbatan sanksiyalarni bekor qilish bo‘yicha prinsipial qaror qabul qilingan bo‘lishi mumkin.
Ekspert bu jarayonni ijobiy baholadi va Rossiyaning xalqaro sport maydonlariga qaytishi sportning rivojlanishi uchun muhim ekanini ta’kidladi. Uning fikricha, yirik musobaqalar Rossiyasiz o‘z jozibasini yo‘qotmoqda.
Tochilin FIFA prezidenti Janni Infantinoning Rossiyaga qo‘yilgan taqiqni «mazmunsiz» deb baholaganini eslatib, bu bayonotni dunyo siyosiy vaziyatining o‘zgarishi bilan izohladi. U Rossiyaga nisbatan ikki xil yondashuv mavjudligini ta’kidladi va vaqt o‘tishi bilan bu cheklovlarning mantiqsizligi anglashilayotganini aytdi.
Ekspertning fikricha, agar MOK sanksiyalarni bekor qilsa, bu boshqa tashkilotlarga, jumladan, FIFA va UEFAga ham ta’sir ko‘rsatishi mumkin. U bu jarayonni «zanjirli reaksiya» deb atadi.
Shuningdek, FIFA aprel oyidagi kongressda Rossiyaning xalqaro musobaqalarga qaytishini muhokama qilishi mumkinligi haqida xabarlar tarqalganini qayd etdi. Tochilin Rossiya qaytgan taqdirda ham ayrim jamoalar o‘yinlardan bosh tortishi mumkinligini tan oldi.
Bunday holatlarda har bir tashkilot o‘z reglamentiga tayanib ish olib borishi va qoidabuzarlarga tegishli choralar ko‘rishi kerakligini ta’kidladi. U texnik mag‘lubiyatlar orqali bunday harakatlarning foydasiz ekanini ko‘rsatish mumkinligini qo‘shimcha qildi.
Sportni siyosatdan xoli saqlash tamoyili asosiy shior bo‘lishi lozimligini eslatib o‘tdi.
