Lui Saa Maykl Karikka ishonch bildirdi
“Manchester Yunayted” jamoasining sobiq hujumchisi Lui Saa klubning vaqtinchalik bosh murabbiyi Maykl Karikka ishonch bildirdi. Bu haqda Zamin.uz xabar berdi.
Unga ko‘ra, Karik qisqa vaqt ichida o‘zini yaxshi tomondan ko‘rsata oldi. Saa, xususan, jamoaning o‘yin uslubi va natijalarida ijobiy o‘zgarishlar kuzatilganini ta’kidladi.
U Karikni mehnatkash va kamtar inson sifatida tavsiflab, uning klubning ichki muhitini va “Old Trafford”dagi bosimni yaxshi tushunishini alohida qayd etdi. Avvalroq Maykl Ouen ham Karikka imkoniyat berish kerakligini aytgan edi.
Lui Saa Karikning o‘z tajribasi va klubga bo‘lgan sadoqati jamoaga foyda keltirishi mumkinligini ta’kidladi. Shu bilan birga, u agar Karlo Anchelotti yoki Zinedin Zidan kabi tajribali murabbiylar nomzodi ko‘rib chiqilsa, bu boshqa darajadagi qaror bo‘lishini ham eslatib o‘tdi.
Hozirgi vaqtda “Manchester Yunayted” Angliya Premyer-ligasining turnir jadvalida to‘rtinchi o‘rinda bormoqda. Bu haqda euro-football.ru xabar berdi.
