Vlahovichning "Barselona"ga o‘tishi mavhumligicha qolmoqda
"Yuventus" futbol klubi hujumchisi Dushan Vlahovichning "Barselona"ga o‘tishi haqidagi mish-mishlar so‘nggi kunlarda yana kun tartibiga chiqdi. Bu haqda Zamin.uz xabar berdi.
Ushbu xabarni euro-football.ru sayti tarqatdi. Ma’lum bo‘lishicha, serbiyalik futbolchi "Barselona" tarkibiga erkin agent sifatida qo‘shilishi mumkin, chunki uning "Yuventus" bilan amaldagi shartnomasi kelasi yil yozda yakunlanadi.
Bundan tashqari, Serbiya terma jamoasi murabbiylar shtabidan bir vakilning fikrlari bu masalani yanada dolzarb qildi. Shu bilan birga, futbol olamida mashhur insayder Fabritsio Romano bu haqda o‘z izohini berdi.
Unga ko‘ra, Serbiya murabbiyining bayonotlari to‘liq haqiqatga mos kelmaydi. Romano ta’kidlashicha, Vlahovich hozircha hech qanday klub bilan kelishuvga erishmagan.
"Yuventus" sport direktori Federiko Ottolini esa futbolchi bilan shartnomani uzaytirish masalasini hali rad etmagan. Romano, shuningdek, "Barselona" oktyabr oyida Vlahovich bilan bog‘langanini tasdiqladi, biroq bu kelishuvning amalga oshishi ko‘p jihatdan "Barselona"dagi Levandovski bilan bog‘liq vaziyatga bog‘liq, deb qo‘shimcha qildi.
Vlahovichga qiziqayotgan boshqa klublar ham bor. Jumladan, "Bavariya", "Milan" va boshqa jamoalar bu futbolchining kelajagini kuzatib bormoqda.
