“PSJ” muxlislari xatti-harakatlari yana muhokamada

8-fevral kuni Fransiya chempionati 21-turidan o‘rin olgan “PSJ” va “Marsel” jamoalari o‘rtasidagi uchrashuv Parijdagi “Park de Prens” stadionida bo‘lib o‘tdi. Bu haqda Zamin.uz xabar berdi.

Ushbu o‘yin natijasi (5:0) bilan bir qatorda, tribunadagi holatlar ham jamoatchilik e’tiborini tortdi. Le Parisien xabariga ko‘ra, “PSJ” muxlislari bu safar o‘z xatti-harakatlari bilan salbiy tomondan ajralib turdi.

Uchrashuv davomida “PSJ” tarafdorlari raqib jamoa sha’niga haqoratli shiorlar aytib, shuningdek, mazmunan shunga o‘xshash bannerlarni namoyish qilishdi. Ayrim iboralarning mazmuni irqchilik sifatida baholanishi mumkinligi ta’kidlangan, ammo yuristlarning fikriga ko‘ra, buni isbotlash oson emas.

O‘yin so‘ngiga 20 daqiqa qolganida tribunada ko‘plab fayerlar yoqilganligi sababli uchrashuv vaqtincha to‘xtatildi. Klub rahbariyati o‘yin boshidan muxlislarga bunday harakatlardan tiyilishni so‘ragan edi, biroq vaziyatni nazorat qilishning imkoni bo‘lmadi.

Ma’lumki, avvalroq “PSJ” muxlislarining xatti-harakatlari sababli klubga tribunaning bir qismini yopish jazosi qo‘llangandi. Endi esa, 18-fevral kuni mahalliy Intizomiy qo‘mita tomonidan shunga o‘xshash sanksiyalar qo‘llanish ehtimoli yuqori.

Bu haqda batafsil ma’lumotni euro-football.ru sayti xabar berdi.