Ronaldu sabab «Al-Nasr»da ichki o‘zgarishlar boshlandi
Krishtianu Ronaldu bilan bog‘liq voqealar «Al-Nasr» klubida ichki noroziliklarni keltirib chiqardi. Bu haqda Zamin.uz xabar berdi.
Arriyadiyah xabariga ko‘ra, klub direktorlar kengashi raisi Muhammad al-Skit o‘z lavozimidan iste’fo berdi. U qarorini shaxsiy sabablar bilan izohlagan bo‘lsa-da, tafsilotlarni oshkor qilmagan.
Ushbu ma’lumotni euro-football.ru sayti tasdiqlagan. Avvalroq klubda Ronalduga yaqin bo‘lgan portugaliyaliklar — Joze Semedu va Simao Koutinyoning vakolatlari qayta tiklangani haqida xabarlar tarqalgan edi.
Manbalarning ta’kidlashicha, Ronalduga klubdagi ichki muammolarni hal qilishda muayyan kafolatlar berilgan. Shuningdek, «Al-Nasr» boshqaruv tizimida o‘zgarishlar davom etishi kutilmoqda.
Jamoa ayni damda Saudiya Arabistoni Professional Ligasi (APL) turnir jadvalida ikkinchi o‘rinni egallab turibdi. Bu o‘zgarishlar klubning kelgusi natijalariga qanday ta’sir ko‘rsatishini vaqt ko‘rsatadi.
