Eldor Shomurodov Yevropa to‘purarlar reytingida kuchli o‘ntalikda

Yevropa futboli doimiy ravishda dunyo sportining markazida turadi. Bu haqda Zamin.uz xabar berdi.

Ayniqsa, qit’aning eng kuchli chempionatlarida to‘p surayotgan futbolchilar faoliyati barchaning diqqat markazida. Yaqinda nufuzli footmercato.net portali Yevropaning eng yaxshi to‘purarlarini o‘z ichiga olgan yangi reytingni e’lon qildi.

Ushbu ro‘yxatda Germaniya, Angliya, Ispaniya, Italiya, Turkiya va boshqa kuchli ligalarda to‘p surayotgan hujumchilarning gollari va o‘yinlari tahlil qilingan. Reytingning birinchi o‘rnida “Bavariya” klubi hujumchisi Harri Keyn joylashgan.

U 21 uchrashuvda 24 ta gol urib, jamoasining muvaffaqiyatiga katta hissa qo‘shmoqda. Undan keyin esa “Real” hujumchisi Kilian Mbappe joylashgan.

U 22 o‘yinda 23 ta gol kiritib, Keynni ta’qib etishda davom etmoqda. Yevropaning boshqa taniqli futbolchilari, jumladan, Erling Xoland, Vangelis Pavlidis va Ayase Ueda ham yuqori natijalar ko‘rsatmoqda.

O‘zbekiston futbol ishqibozlari uchun esa bu reytingda yana bir xushxabar bor. Legionerimiz Eldor Shomurodov ham kuchli o‘ntalikka kirishga muvaffaq bo‘ldi.

U Turkiya Superligasidagi “Istanbul Bashakshehir” klubi safida barqaror o‘yin ko‘rsatib, 21 uchrashuvda 15 ta gol urdi. Shomurodov Turkiya chempionatida “Beshiktosh”, “Galatasaroy”, “Trabzonspor” kabi kuchli jamoalarga qarshi ham o‘zini ko‘rsata oldi.

Hozircha u faqat ikki jamoa – “Gyoztepe” va “Fenerbahche” darvozasini ishg‘ol qila olmagan. Eldor Shomurodovning Italiyadan keyin Turkiyada tez moslashgani va samarali o‘yin namoyish qilayotgani uning tajribasi va mahoratini yana bir bor tasdiqlaydi.

Agar u shu tempda davom etsa, mavsum oxirida reytingda yanada yuqori o‘rinlarni egallashi mumkin. Yevropadagi golchilar poygasining qizg‘in kechayotgani shubhasiz, ammo biz uchun eng quvonarlisi – O‘zbekiston vakilining kuchli o‘ntalikda bo‘lishidir.

Manba: footmercato.net