Angliya Kosta-Rika bilan 10-iyunda o‘ynaydi
Angliya terma jamoasi jahon chempionati boshlanishidan avval navbatdagi o‘rtoqlik uchrashuvini o‘tkazishga kelishib oldi. Bu haqda Zamin.uz xabar berdi.
The Mirror nashrining xabariga ko‘ra, inglizlarning bu safargi raqibi Kosta-Rika terma jamoasi bo‘ladi. Ushbu ma’lumotni euro-football.ru sayti ham tasdiqlagan.
Mazkur o‘yin 10-iyun kuni o‘tkazilishi rejalashtirilgan. Bundan oldin esa Angliya termasi 6-iyun kuni Yangi Zelandiya bilan ham o‘rtoqlik uchrashuvi o‘tkazishi haqida xabar berilgan edi.
Har ikki bahs AQShning Florida shtatida joylashgan mashg‘ulot bazasi yaqinida tashkil etiladi. Aniq stadion manzili esa keyinchalik e’lon qilinishi kutilmoqda.
Angliya va Kosta-Rika jamoalari shu kungacha ikki marta uchrashgan. 2018 yilda bo‘lib o‘tgan o‘rtoqlik o‘yinida Angliya Markus Reshford va Denni Uelbekning gollari evaziga 2:0 hisobida g‘alaba qozongan.
2014 yilgi jahon chempionati guruh bosqichida esa mazkur jamoalar o‘rtasidagi bellashuv 0:0 hisobidagi durang bilan yakunlangan edi. Angliya termasi joriy jahon chempionatidagi ishtirokini 17-iyun kuni Xorvatiyaga qarshi o‘yin bilan boshlaydi.
Ushbu guruhda, shuningdek, Gana va Panama terma jamoalari ham qatnashadi. Angliya jamoasi mazkur musobaqada muvaffaqiyatli ishtirok etishni maqsad qilgan.
