“Dinamo” Kingsli Sarfo bilan shartnoma imzoladi
Samarqandning “Dinamo” futbol klubi 30 yoshli ganalik yarim himoyachi Kingsli Sarfo bilan bir yillik shartnoma imzolaganini e’lon qildi. Bu haqda Zamin.uz xabar berdi.
Bu haqda jamoaning matbuot xizmati xabar berdi. Kingsli Sarfo ilgari voyaga yetmagan qizga nisbatan jinsiy jinoyat sodir etganlikda ayblangani va sudlanganligi bilan tanilgan futbolchilardan biridir.
Ochiq manbalarga ko‘ra, Sarfo 2017 yilda Shvetsiyaning “Malmyo” futbol klubida o‘ynab yurgan paytda 14 yoshli qizga nisbatan jinoyat sodir etganlikda aybdor deb topilgan. Shvetsiya qonunchiligiga muvofiq, 15 yoshga to‘lmagan shaxs bilan jinsiy aloqaga kirishish bola zo‘rlash jinoyati hisoblanadi.
Sud qaroriga ko‘ra, u 2 yil 8 oy muddatga ozodlikdan mahrum etilgan, mamlakatdan deportatsiya qilingan va jabrlanuvchi foydasiga 150 ming shved kronasi miqdorida tovon puli to‘lashga majbur qilingan. Kingsli Sarfo jazoni o‘tab bo‘lgach, Kiprning APOEL klubida to‘p surgan.
Endilikda u “Dinamo” safida o‘ynash uchun Samarqandga kelgan. Bu transfer jamoa uchun muhim voqea bo‘lsa-da, futbolchining o‘tmishi ijtimoiy tarmoqlarda va jamoatchilik orasida turli munozaralarga sabab bo‘lmoqda.
