Abduqodir Husanov "Fulxem"ga qarshi ishonchli o‘ynadi
Angliya Premyer ligasining 26-turida "Manchester Siti" jamoasi o‘z maydonida "Fulxem"ni 3:0 hisobida mag‘lub etdi. Bu haqda Zamin.uz xabar berdi.
Xosep Gvardiola boshqaruvidagi jamoa birinchi bo‘limdayoq o‘yinning taqdirini hal qildi. 34–39-daqiqalar oralig‘ida Antuan Semeno, Niko O’Rayli va Erling Holand ketma-ket gol urib, jamoasini oldinga olib chiqdi.
Shu qisqa vaqt ichida "Siti"ning pressingi va hujumdagi aniqligi raqibni himoyaga tiqib qo‘ydi. Mazkur o‘yinda o‘zbekistonlik futbolchi Abduqodir Husanovning maydonga qaytishi alohida e’tiborga sazovor bo‘ldi.
"Liverpul"ga qarshi uchrashuvda jarohat olgan Husanov bu safar 60-daqiqada zahiradan tushirilib, himoyaning o‘ng qanotida o‘ynadi. U o‘zining intizomli va ishonchli harakatlari bilan ekspertlar e’tiborini tortdi.
O‘yin tempi yuqori bo‘lgan lahzalarda ham futbolchi vaziyatlarni to‘g‘ri o‘qib, pozitsiyasini yo‘qotmadi. O‘yindan keyin nufuzli manbalar futbolchilarning harakatlariga baho berdi.
Abduqodir Husanov 7/10 ball bilan zahiradan tushgan futbolchilar orasida eng yuqori baholandi. Tahlilchilar uning o‘z pozitsiyasida ishonchli va samarali o‘ynaganini ta’kidlashdi.
Darvozabon Janluiji Donnarumma 7/10, Ruben Diash 7/10, chap qanot himoyachisi Rayan Ait-Nuri 7,5/10 ball oldi. Yana bir qator futbolchilar, jumladan, Antuan Semeno va Niko O’Rayli esa 8,5/10 ball bilan yuqori baholandi.
Kelgusi o‘yinda "Manchester Siti" 21 fevral kuni "Nyukasl"ga qarshi maydonga tushadi. Husanovning ishonchli o‘yini va jamoaning barqaror formasi muxlislar uchun katta qiziqish uyg‘otmoqda.
Ekspertlar fikricha, Husanovning hozirgi barqaror o‘yini uni asosiy tarkibga nomzod qilib ko‘rsatmoqda.
