RB Leyptsig darvozaboni Gulachi 1,5 oy o‘ynamaydi
RB Leyptsig futbol klubi bir muddat asosiy darvozaboni Peter Gulachisiz qoladigan bo‘ldi. Bu haqda Zamin.uz xabar berdi.
Klub matbuot xizmatining ma’lum qilishicha, tajribali posbon kamida bir yarim oy davomida maydonga tusha olmaydi. Ushbu ma’lumot euro-football.ru tomonidan tasdiqlangan.
Vengriyalik darvozabon jarohatni “RB Leyptsig” va “Volfsburg” jamoalari o‘rtasidagi o‘yinda olgan. U birinchi bo‘limdayoq maydonda o‘ynashni davom ettira olmay, o‘yinni tark etishga majbur bo‘lgan.
Shifokorlarning xulosasiga ko‘ra, Gulachining chap tizzasidagi medial kollateral bog‘lam uzilgan. Biroq, yaxshi tomoni shundaki, unga jarrohlik amaliyoti talab qilinmaydi.
Peter Gulachi joriy mavsumda 22 ta rasmiy uchrashuvda ishtirok etgan va ulardan 10 tasida darvozasini gol o‘tkazmasdan saqlab qolgan. Hozirda “RB Leyptsig” Germaniya chempionati turnir jadvalida 40 ochko bilan beshinchi o‘rinni egallab turibdi.
