Kavani "Boka Xuniors"ni tark etishi mumkin

Urugvaylik futbolchi Edinson Kavani Argentinaning "Boka Xuniors" jamoasini tark etishi mumkin. Bu haqda Zamin.uz xabar berdi.

Bu qaror uning shaxsiy istagidan ko‘ra, jamoada yuzaga kelgan vaziyat bilan bog‘liq bo‘lib, ma’lum ma’noda majburiy tus olmoqda. So‘nggi o‘yinlarda Kavanining o‘yini muxlislarni qoniqtirmayapti.

Stadiondagi tomoshabinlar uning maydondagi harakatlariga norozilik bildirishni ochiqdan-ochiq namoyon etmoqda. Bu haqda "euro-football.ru" xabar berdi.

Navbatdagi uchrashuvda Kavani almashtirilgan payt ham muxlislar hushtakbozlik qilib, noroziligini bildirishdi. Biroq mazkur almashtirish o‘yinning natijasiga hech qanday ta’sir ko‘rsatmadi.

"Boka"ning "Platenese"ga qarshi o‘yini 0:0 hisobida yakunlandi, ya’ni jamoa raqib darvozasiga gol ura olmadi. Shundan so‘ng Argentinadagi ommaviy axborot vositalari Kavanining klub bilan shartnomasini uzaytirish ehtimolini ehtiyotkorlik bilan baholay boshladi.

Bundan tashqari, "Boka" yaqinda tarkibiga yangi futbolchi, paraguaylik Adam Bareyroni qo‘shib oldi. Mutaxassislar va muxlislar bu o‘zgarish 39 yoshli tajribali Kavani uchun asosiy tarkibdagi o‘rnini xavf ostiga qo‘yishi mumkinligini ta’kidlashmoqda.