O‘zbek bokschilari “Strandja” turnirini g‘alabalar bilan boshladi

Bolgariyaning Sofiya shahrida 77-chi an’anaviy “Strandja” xalqaro boks turniri boshlandi. Bu haqda Zamin.uz xabar berdi.

Musobaqaning birinchi kunida ringga chiqqan 7 nafar bokschimizning janglari muxlislar uchun qiziqarli va hissiyotlarga boy o‘tdi. Ba’zilari ishonchli g‘alaba qozonib, keyingi bosqichga yo‘l oldi, ba’zilari esa omad yetishmasligi sababli musobaqani tark etdi.

70 kilogramm vazn toifasida qatnashgan Abdulaziz Jo‘raqulov dastlabki jangida qozog‘istonlik Muhammadsobir Bazarbay Uulu bilan kuch sinashdi. Yosh bokschimiz raqibga qarshi qo‘rqmasdan harakat qildi va xarakter ko‘rsatdi.

Ammo bir necha kichik xatolar yakunda uning mag‘lubiyatiga sabab bo‘ldi. Abdulaziz 0:5 hisobida imkoniyatni boy berdi.

55 kilogramm vazn toifasidagi Samandar Olimov esa o‘zining birinchi jangida Ukraina vakili Elmir Nabiyevga qarshi ringga chiqdi. U jang davomida tempni ushlab, zarbalarining aniqligini saqladi va vaziyatni to‘g‘ri boshqardi.

Samandar 5:0 hisobida ishonchli g‘alaba qozonib, musobaqani keyingi bosqichda davom ettiradigan bo‘ldi. 90 kilogramm vazn toifasida esa Samir Sobirov turkiyalik Emre Taskin bilan to‘qnashdi.

Jang davomida Samir raqibidan butunlay ustunlik qilgan holda 5:0 hisobida g‘alaba qozondi. Ushbu natija nafaqat keyingi bosqichga yo‘l, balki jamoaning ruhiyatini ko‘tarish uchun ham muhim bo‘ldi.

Eslatib o‘tamiz, musobaqada bizni hali ko‘plab qiziqarli janglar kutmoqda. Jumladan, Fazliddin Erkinboyev mo‘g‘ulistonlik Dalai Ganzorigga qarshi ringga chiqadi.

Demak, “Strandja” turniridagi ishtirokimiz yanada qizg‘in davom etadi. Muxlislar esa navbatdagi g‘alabalardan umid qilmoqda.

Manba: one.uz.