Argentina chempionati moliyaviy mojarolar sabab to‘xtatildi
Argentina futbol chempionati bir haftaga to‘xtatiladi. Bu haqda Zamin.uz xabar berdi.
9-tur uchrashuvlari boshqa muddatga ko‘chirilgan. Ushbu qaror mamlakat futbol federatsiyasi (AFA) atrofida yuzaga kelgan moliyaviy mojarolar sabab qabul qilindi.
Bu haqda euro-football.ru xabar berdi. Ma’lumki, 7 va 8-tur o‘yinlari belgilangan tartibda o‘tkaziladi, biroq tanaffus aynan 9-turga to‘g‘ri keladi.
Dastlabki jadvalga ko‘ra, 9-tur 5–8 mart kunlari o‘tkazilishi lozim edi. Ammo mazkur davrda AFA prezidenti Klaudio Tapianing korrupsiya bilan bog‘liq masalalar yuzasidan sud oldida javob berishi kutilmoqda.
Shuningdek, derbyderbyderby.it ma’lumotiga ko‘ra, sobiq futbolchilar va tashkilot xodimlariga pensiya to‘lovlari bilan bog‘liq noqonuniy moliyaviy sxema aniqlangan. Ushbu sxema orqali 19 milliard peso miqdoridagi soliq to‘lovlaridan qochilgan bo‘lishi mumkin.
Bu mablag‘ Yevro hisobida qariyb 12 millionni tashkil qiladi. Bundan tashqari, federatsiya pul yuvish jarayonlariga ham aloqador bo‘lishi mumkinligi taxmin qilinmoqda.
Hozircha bu masalalar bo‘yicha rasmiy qarorlar kutilmoqda. Shu sababli, chempionatning 9-tur o‘yinlari qachon o‘tkazilishi haqida hozircha aniq ma’lumot yo‘q.
