“Arsenal” Chempionlar ligasi favoritlari ro‘yxatida yetakchi

Goal portali jurnalistlari Chempionlar ligasining pley-off bosqichi doirasidagi uchrashuvlar yakunidan so‘ng turnirning asosiy favoritlari ro‘yxatini qayta tuzdilar. Bu haqda Zamin.uz xabar berdi.

Reytingning birinchi pog‘onasida hozircha Londonning “Arsenal” jamoasi joylashgan. Ammo qiziq jihati shundaki, “Arsenal” hali o‘z tarixida biror marta ham Chempionlar ligasi chempioni bo‘lmagan.

Bu haqda euro-football.ru xabar berdi. “Arsenal”ning turnirdagi eng yirik muvaffaqiyati 2006 yilda erishilgan final o‘yinidir.

O‘sha yili londonliklar finalda “Barselona”ga qarshi maydonga tushib, 1:2 hisobida mag‘lubiyatga uchragan edi. Yangilangan reytingga ko‘ra, ikkinchi o‘rinni Germaniyaning “Bavariya” klubi egallagan.

Kuchli uchlikni esa Angliyaning “Manchester Siti” jamoasi yakunlagan. Keyingi o‘rinlarda “Liverpul”, “PSJ”, “Barselona”, “Real Madrid”, “Chelsi”, “Atletiko Madrid”, “Sporting”, “Nyukasl”, “Atalanta”, “Bude-Glimt”, “Tottenhem”, “Galatasaroy” va “Bayer” jamoalari joylashgan.

Ma’lumot uchun, o‘tgan mavsumda Chempionlar ligasi g‘olibligini Parijning “PSJ” jamoasi qo‘lga kiritgan edi.